Dy javë më parë, kryeministri Edi Rama nëpërmjet një komunikimi online, njoftoi mbylljen e të gjitha pikave kufitare me Greqinë për udhëtarët.
Mirëpo bllokimi i kufirit rezulton fiktiv, për shkak se në Kapshticë gjatë 24 orëve të fundit janë futur 134 shtetas shqiptarë, raporton “Balkanweb”.
Deri më tani nuk ka pasur një urdhër shfuqizues dhe për këtë arsye ngrihen dyshime se situata nuk po menaxhohet ashtu si duhet.
Pavarësisht se në Shqipëri bilanci i COVID-19 po rëndohet nga dita në ditë, ky fakt mesa duket nuk përbën shqetësim për autoritetet shqiptare, që lejojnë futjen në vend të personave që vijnë nga vendet e prekura.
Sipas udhëzimeve të Ministrisë së Shëndetësisë, udhëtarët duhet të kontrollohen në kufi, si dhe duhet të plotësojnë formularin me të dhënat personale.
Ata duhet të vetëkarantinohen për 14 ditë, përndryshe do të gjobiten me 7 milion lekë të vjetra.
Deri më tani në Shqipëri numërohen 89 të prekur nga COVID-19, në mesin e të cilëve 5 viktima dhe një i shëruar.
Në spitalin Infektiv ndodhen 43 persona, 3 prej të cilëve mbahen në terapi intensive.
Pas Shqipërisë së mesme, harta e koronavirusit është zgjeruar edhe në jug, me Korçën dhe viktimën në Kuçovë.
