Sekretari Amerikan i Shtetit, Antony Blinken i ka dërguar një letër urimi kryeministrit të vendit Edi Rama, për fitoren në zgjedhjet e 25 prillit. Në letrën e tij Blinken ndër të tjera ka theksuar se SHBA-të do ta mbështesin Shqipërinë për të kryer reformën në drejtësi.
Blinken thekson se pret që të punoj me të gjatë mandatit të tij të tretë si Kryeministër, për të forcuar më tej bashkëpunimin mes dy vendeve mbi demokracinë dhe mbrojtjen, si dhe tregtinë dhe investimet.
Sipas tij, Shqipëria është një Aleate e fortë e NATO-s dhe se i përgëzon për përparimet e Shqipërisë drejt Betimit të Uellsit. Ai ka theksuar më tej se SHBA-të janë mirënjohëse për bashkëpunimin në fushën e mbrojtjes dhe e vlerësojnë shumë Shqipërinë për pritjen e Defender 21.
Letra e plotë e Sekretarit Amerikan, Antony Blinken:
I nderuar Z. Kryeministër:
Urime për ju dhe partinë tuaj për suksesin tuaj elektoral. Unë gjithashtu dua të përgëzoj popullin e Shqipërisë që, megjithë kufizimet e pandemisë COVID-19, ushtroi të drejtat e tyre themelore në zgjedhjet e 10-të kombëtare të vendit që nga rënia e komunizmit.
Unë pres që të punoj me ju gjatë mandatit tuaj të tretë si Kryeministër për të forcuar më tej bashkëpunimin tonë mbi demokracinë dhe mbrojtjen, si dhe tregtinë dhe investimet.
Ne do të vazhdojmë të mbështesim Shqipërinë ndërsa punon për të forcuar shtetin e së drejtës, për të përmirësuar llogaridhënien e qeverisë dhe për të kryer reformën në drejtësi. Përmes këtyre zgjedhjeve paqësore, Shqipëria ka demonstruar më tej gatishmërinë e saj për të hapur negociatat e pranimit në BE.
Shqipëria është një Aleate e fortë e NATO-s dhe ne ju përgëzojmë për përparimin tuaj drejt Betimit të Uellsit. Ne jemi mirënjohës për bashkëpunimin tonë në fushën e mbrojtjes dhe e vlerësojmë shumë Shqipërinë për pritjen e Defender 21.
Ne përballemi me shumë kriza në të gjithë globin, dhe unë kam besim se së bashku mund të ngrihemi për të përmbushur këto sfida historike. Ne kemi një mundësi dhe një përgjegjësi për të ndërtuar një të ardhme paqësore të rrënjosur në liri dhe prosperitet për të gjithë.
Sinqerisht,
Antony J. Blinken
