Bjellorusia tërhoqi ditën e sotme përfaqësuesin e saj të përhershëm në Bashkimin Evropian për konsultime pasi Brukseli vendosi sanksione të reja ekonomike në përgjigje të autoriteteve të Bjellorusisë që detyruan një avion të Ryanair të zbarkonte në Minsk.
Ministria e jashtme Bjelloruse sugjeroi që përfaqësuesi i BE në Minsk të largohej gjithashtu për konsultime dhe tha se ata që janë përgjegjës për sanksionet, të cilat synojnë industritë kryesore të eksportit të Bjellorusisë dhe hyrjen në financa, do të ndalohen të hyjnë në Bjellorusi.
Bjellorusia njoftoi gjithashtu se po pezullonte pjesëmarrjen e saj në Partneritetin Lindor, një iniciativë për të forcuar lidhjet midis BE dhe ish-fqinjëve të saj Sovjetikë.
BE, SHBA, Britania dhe Kanada sanksionuan Bjellorusinë pas ndalimit të avionit me pretendimin se në bord kishte bombë, ku autoritetet arrestuan aktivistin e opozitës Roman Protasevich.
Sanskionet ishin më të fundit e një serie masash kundër Presidentit Alexander Lukashenko, i cili ka qeverisur Bjellorusinë për gati tre dekada dhe goditi opozitën pasi protestat masive shpërthyen pas zgjedhjeve të diskutueshme presidenciale të vitit të kaluar.
“Republika e Bjellorusisë pezullon pjesëmarrjen e saj në nismën e Partneritetit Lindor të BE. Bjellorusia nuk mund të përmbushë detyrimet e saj sipas kësaj marrëveshje në kontekstin e sanksioneve dhe kufizimeve të vendosura nga BE”, tha ministria e jashtme Bjelloruse në një deklaratë të hënën.
Ndër të tjera në deklaratë thuhej se pezullimi i marrëveshjes do të ketë një ndikim negativ në ndërveprimin me Bashkimin Evropian në fushën e luftimit të migrimit të paligjshëm dhe krimit të organizuar.
