Ministria e Shëndetësisë ka bërë publike shifrat në lidhje më pandeminë e COVID-19, në vendi tonë. Gjatë 24 orëve të fundit janë regjistruar 22 raste të reja, ndërsa fatmirësisht nuk është raportuar asnjë humbje jete. Lajm i mirë është se e kanë fituar betejën me virusin e rrezikshëm 14 pacientë, ndërsa numri i rasteve aktive në të gjithë territorin e vendit është 280 qytetarë.
Gjithashtu nisur dhe nga fakti që varianti “Delta” i koronavirusit është duke qarkulluar në Shqipëri, MSH iu ka bërë apel qytetarëve që të vaksinohen. Po ashtu Ministria e Shëndetësisë iu bën thirrje qytetarëve që të zbatojnë me përpikmëri masat e vendosura anti-COVID.
Njoftimi i plotë i Ministrisë së Shëndetësisë:
Nisur nga konfirmimi i qarkullimit të variantit Delta në Shqipëri, MSHMS apelon qytetarët të vaksinohen sa më parë, për të frenuar përhapjen e virusit të rrezikshëm. Vaksinat reduktojnë mundësinë e infektimit dhe shmangin në shkallë të lartë hospitalizimet dhe fatalitetet.
Varianti Delta i infeksionit Sars-Cov2 është varianti më i transmetueshëm, ndaj respektimi i masave të distancimit fizik, vendosja e maskave në ambientet e brendshme dhe higjena, janë thelbësore për kufizimin e përhapjes së virusit.
Për çdo dyshim, kontaktoni me mjekun tuaj të familjes për t’u testuar ose telefononi Urgjencën Kombëtare në numrin unik 127.
Ju informojmë për situatën në 24 orët e fundit, si vijon:
Janë kryer 4,078 testime, nga të cilat kanë rezultuar pozitivë me Covid19, 22 qytetarë, në këto bashki: 4 raste në Elbasan, 3 raste në Tiranë, Kurbin, Kukës, 2 raste në Lezhë, Gjirokastër, Dimal, 1 rast në Kavajë, Vlorë, Fushë- Arrëz.
Aktualisht janë 280 pacientë aktivë me COVID19 në të gjithë vendin.
Në Spitalin Infektiv po marrin trajtim spitalor të specializuar 9 pacientë.
Në 24 orët e fundit nuk ka asnjë humbje jete me Sars-Cov2 pozitiv.
Janë shëruar 14 qytetarë gjatë 24 orëve të fundit, duke e çuar numrin e të shëruarve në 130,139 që nga fillimi i epidemisë.
Statistika (25 Korrik 2021)
Raste të reja ditore 22
Të shëruar në 24 orë 14
Të shtruar në spitale 9
Humbje jete në 24 orë 0
Testime ditore 4078
Testime totale 879,340
Raste pozitive 132,875
Raste të shëruara 130,139
Raste Aktive 280
Humbje jete 2,456
Shpërndarja gjeografike e rasteve aktive sipas qarqeve:
Tiranë 98
Elbasan 30
Kukës 29
Vlorë 26
Lezhë 26
Durrës 18
Shkodër 17
Fier 14
Berat 13
Korçë 6
Gjirokastër 3
