Ish-kryeministri i Shqipërisë, Sali Berisha, ka shprehur shqetësimin e tij kundrejt qeverisë, të cilët nuk iu janë përgjigjur me kohë nevojës së qytetarëve teksa zjarri po shkrumonte gjithçka që kishte përpara. “Në Shqipëri reagimi ndaj zjarreve ishte tipik ai i një narkoshteti. Në narkoshtet interesi publik është i injoruar”, tha fillimisht Berisha.
Më tej, ish-kryeministri shtoi: “Në kohën që zjarret po shkrumonin ullishte dhe pyje narkqeveritarët dhe narkozyrtarët zhgryheshin në vakanca. Njerëzit janë përballur me mjete rrethanore me zjarret. Mbretëria e Hollandës ka dërguar dy helikopterë, për çka meriton mirënjohje.
Një mirënjohje të veçantë kam edhe për njësitë e ushtrisë amerikane dhe të forcave ushtarake të Kosovës që po ndihmojnë në menaxhimin e situatës të rëndë të krijuar nga zjarret në të katër anët e vendit.
Nga 5 helikopterë të rinjë që disponon ushtria shqiptare për mungesë të shërbimeve, vetëm një fluturon. Helikopteri përdoret si taksi nga Rama dhe narkoqeveritarët e tij. Qytetarët denoncojnë deklarata fallco të narkoqeverisë në të cilat flitet për ndërhyrje në kohë kundër zjarreve ndërkohë që të tilla nuk janë. Gjithmonë zjarret kanë natyrë të dyfishtë të qëllimshme dhe nga pakujdesia.
Narkoshteti është shtet kleptokratik, domethënë që vjedh dhe përpiqet të vjedhë në çdo gjë. Janë raportuar abuzime masive me fondet e tërmetit dhe nuk ka asnjë përjashtim në fatkeqësitë e tjera”, përfundoi Berisha për Infosot.com. Shqipëria prej 19 ditësh është e përfshirë nga flakët…
