Ambasada amerikane në Tiranë, ka reaguar në lidhje me vendimin e Lulzim Bashës, për të përjashtuar nga grupi parlamentar i PD-së, ish-kryeministrin Sali Berisha, pas vendimit amerikan për ta shpallur non grata.
Ambasada e ka përshëndetur këtë vendim të Bashës, duke shkruar se meriton respekt dhe vlerëson kurajon e PD-së, që sipas saj ka kurajën që të ndahet nga e shkuara dhe për të vazhduar përpara në një marrëdhënie veçanërisht të ngushtë me SHBA-të. Ndër të tjera ka theksuar se SHBA-të kanë –pasur një marrëdhënie të veçantë me Partinë Demokratike që nga themelimi i saj dhe se presin që të punojnë më ngushtë edhe me kryetarin Basha.
Reagimi i Ambasadës së SHBA-së
Vendimi i vështirë i shpallur dje nga Kryetari Lulzim Basha meriton respekt. Ky vendim demonstron se, ashtu siç ndodhi 30 vjet më parë dhe në momente të tjera kritike në historinë e Shqipërisë, Partia Demokratike ka kurajon për t’u ndarë nga e shkuara me qëllim që të ndërtojë të ardhmen, për të ndihmuar që ta udhëheqë Shqipërinë përpara. Shtetet e Bashkuara kanë pasur një marrëdhënie të veçantë me Partinë Demokratike që nga themelimi i saj dhe presim me kënaqësi të punojmë më ngushtë se kurrë me Kryetarin Basha dhe Partinë Demokratike për të forcuar marrëdhëniet SHBA-Shqipëri.
Vendimi i Lulzim Bashës
Mbrëmë kreu i Partisë Demokratike, Lulzim Basha deklaroi se Sali Berisha nuk do të jetë pjesë e grupit parlamentar të PD-së, deri në zbardhjen e plotë të vendimit të DASH, e ku të sqarohet e gjithë e vërteta. Basha tha se PD është partia më proamerikane dhe më proevropiane duke folur dhe për vendimin e DASH për ish-kryeministrin dhe ish-kreun e PD Sali Berisha si dhe kërkesën e ambasadores amerikane Yuri Kim. Nga ana tjetër, dje në një dalje për mediat Berisha konfirmoi pjesëmarrjen e tij në Kuvend.
