Kreu i Partisë Demokratike, Sali Berisha, në një fjalim drejtuar mbështetësve të tij nga ballkoni i banesës ku ndodhet në “arrest shtëpie” që prej 30 dhjetorit 2023, ka akuzuar qeverinë e Edi Ramës për manipulim të zgjedhjeve dhe për pengimin financiar të opozitës.
Në deklaratën e tij, Berisha theksoi se regjimi nuk lejoi financimin e 61 kandidatëve të opozitës, ndërsa kandidatët e partisë së qeverisë dhe ata të ashtuquajturës “Basho-opozitë” përfituan miliona nga fondet publike. Ai gjithashtu vuri në dukje se në fletët e votimit nuk ishte lejuar emri i kryetarit të opozitës.
“Kujtoni pak zgjedhjet në të cilat vrasësit serialë Bajrëve, Ndokëve, Rrajave, Avdylëve, Bamëve etj., kërcënonin me hanxharët e tyre votuesit dhe demokratët. Kujtoni pak patronazhistët, aktivistët, policinë politike terroriste elektorale të Edi Ramës. Kujtoni pak rrethimin e qendrave të votimit prej tyre dhe transferimin e qendrave të 1.2 milionë zgjedhësve për t’i lënë pa votuar,” tha Berisha.
Berisha po ashtu përmendi se 683 mijë zarfa të pensionistëve dhe qindra milionë euro ishin shpërndarë për të blerë votat. Ai e quajti këtë një propagandë të shpifur të Edi Ramës, e cila akuzoi opozitën për humbjen e zgjedhjeve, duke shpallur kriminelët elektoralë si fitimtarë.
“Propaganda e drejtuar nga qeveria ka një efekt toksik, por të gjitha këto nuk mund të jenë kurrë dekurajim për ne. Të gjitha këto duhet të jenë vetëm nxitje dhe frymëzim për guxim dhe betejë,” përfundoi Berisha.
Këto deklarata të forta vijnë në një kohë kur tensionet politike në vend janë të larta dhe zgjedhjet e fundit janë ende një temë e nxehtë debati mes partive politike.
