Sikur të mos mjaftonin “bëmat” e Tom Doshit, edhe djemtë e tij janë përfshirë në probleme me ligjin, pasi kanë rrahur një punonjës policie në Tiranë.
Si rrjedhojë dy djemtë e ish-deputetit janë shpallur nga kërkim nga policia
Bëhet me dije se ngjarja ka ndodhur në rrugën “Ismail Qemali” në zonën e ish-Bllokut, ku fillimisht e dy djemtë e tij janë konfliktuar me një person.
Pak minuta më pas në vendin e ngjarjes kanë ardhur disa efektivë policie, të cilët sipas bluve të Tiranës kanë kërkuar sqarimin e rrethanave të ngjarjes, por edhe pas kësaj, dy djemtë e ish-deputetit, Markos dhe James Doshi kanë filluar të godasin edhe policët duke iu shkaktuar dëmtime fizike.
Bashkë me ta ishte edhe një persona tjetër që është kapur nga policia, ndërsa Markos dhe James Doshi kanë ikur nga vendi i ngjarjes duke u shpallur në kërkim.
Tashmë ata akuzohen për një mori akuzash si “Goditja për shkak të detyrës”, “Kundërshtimi i punonjësit të Policisë së rendit publik”, “Mosbindja ndaj urdhrit të punonjësit të Policisë së rendit publik” dhe “Prishja e qetësisë publike”.
Njoftimi i Policisë së Shtetit:
Shpallën në kërkim për veprat penale “Plagosja e rëndë me dashje”, “Goditja për shkak të detyrës”, “Kundërshtimi i punonjësit të Policisë së rendit publik”, “Mosbindja ndaj urdhrit të punonjësit të Policisë së rendit publik” dhe “Prishja e qetësisë publike”, të kryera në bashkëpunim, shtetasit M. D., 20 vjeç dhe J. D., 22 vjeç, të dy banues në Tiranë.
Këta 3 shtetas, gjatë një konflikti për motive të dobëta, në rrugën “Ismail Qemali”, kanë goditur me sende të forta shtetasin R. S., 38 vjeç, dhe më pas nuk i janë bindur urdhrave të punonjësve të Policisë, për të ndaluar, por i kanë kundërshtuar ata, duke i goditur për shkak të detyrës. Shtetasi E. L. është vënë në pranga, ndërsa shtetasit M. D. dhe J. D. janë larguar. Vijon puna për kapjen e tyre.
