Sistemi i alarmit RASFF në Bashkimin Europian ka lëshuar një tjetër njoftim më 20 dhjetor për praninë e pesticideve të dëmshme në mandarina nga Shqipëria.
Ky njoftim është shpërndarë nga Presidenti i Urdhërit të Mjekut Veterinar, Ervin Resuli, i cili theksoi se alarmi vjen ende pa u përfunduar analizat për tre ngarkesat e mëparshme që kishin rezultuar me prani të clorpirifosit.
Reagimi i Resulit:
???? Raste të reja me prezencë të clorpirifosit në mandarina shqiptare
Ende pa u mbyllur rezultatet e tre ngarkesave të para për praninë e clorpirifosit në mandarina, sistemi i alarmit RASFF në BE ka lëshuar përsëri njoftim më 20 dhjetor për ngarkesa të tjera me pesticide të larta në mandarina nga Shqipëria!
❓ Ku është Ministria e Bujqësisë?
Ministria ka për detyrë të mbrojë konsumatorin shqiptar dhe të sigurojë standardet e sigurisë ushqimore. Pse po vonohen analizat dhe nuk po publikohen rezultatet? A ka dikush interesa në Ministrinë e Bujqësisë që lejon popullatën shqiptare të konsumojë produkte me nivele të rrezikshme të pesticideve?
⚠️
Kjo situatë është një këmbanë alarmi për shëndetin e qytetarëve dhe për reputacionin e produkteve tona bujqësore. Institucionet përkatëse duhet të reagojnë menjëherë dhe të garantojnë që produkte të tilla të mos përfundojnë në tryezat tona.
