Bashkimi Evropian ka reaguar mbi ndryshimet e propozuara në Kodin e Ri Penal, duke paralajmëruar se disa dispozita të reja mund të ndikojnë negativisht në lirinë e shprehjes, lirinë e medias dhe të drejtat e qytetarëve.
Në një deklaratë zyrtare për Top Channel, BE konfirmoi se është duke analizuar draftin e prezantuar më 25 korrik nga Ministria e Drejtësisë, por theksoi shqetësimet për amendamente të cilat nuk janë në përputhje me standardet evropiane.
“Ne jemi në dijeni të shqetësimeve serioze të shprehura nga përfaqësues të sektorit të drejtësisë, si edhe nga shoqëria civile, në lidhje me një sërë projekt-ndryshimesh. Ne jemi veçanërisht të shqetësuar për disa amendamente të propozuara nga grupi i punës që mund të kenë ndikim negativ mbi të drejtat e qytetarëve, lirinë e shprehjes dhe lirinë e medias. Këto dispozita nuk janë të përafruara me standardet e BE-së dhe ne jemi të bindur se, në kuadër të procesit të konsultimit dhe në kuadër të angazhimeve për anëtarësimin, këto shqetësime do të adresohen”, thuhet në reagimin e BE-së.
Duke qenë se drafti vijon të jetë në fazë konsultimi publik, BE kërkon që ky proces të zhvillohet në mënyrë gjithëpërfshirëse, duke përfshirë institucionet e drejtësisë, shoqërinë civile dhe median. “Ky rishikim më i gjerë i Kodit Penal është një ndërmarrje komplekse, me ndikim të mundshëm afatgjatë në shoqëri dhe në sistemin e drejtësisë penale. BE-ja thekson rëndësinë e garantimit të një konsultimi gjithëpërfshirës dhe të plotë me të gjitha institucionet kryesore të drejtësisë dhe aktorët e sundimit të ligjit, si edhe me shoqërinë civile dhe të gjithë aktorët e tjerë përkatës, me qëllim që legjislacioni që do të rezultojë të jetë i cilësisë më të lartë”, theksohet më tej në deklaratë.
Në përfundim, Bashkimi Evropian inkurajon Shqipërinë që ndryshimet ligjore të fokusohen në përmbushjen e kritereve të përcaktuara në Qëndrimin e Përbashkët të BE-së, si pjesë e procesit të integrimit evropian.
