Bashkimi Europian ka reaguar, menjëherë pas miratimit në Kuvend të marrëveshjes së 5 qershorit e cila ka të bëjë me reformën zgjedhore dhe u arrit pas punës disa mujore të Këshillit Politik.
Ka qenë ambasadori i Bashkimit Europian në Shqipëri, Luigi Soreca i cili me anë të një mesazhi në ‘Twitter” ka përshëndetur miratimin në Kuvend të marrëveshjes së ‘5 qershorit’ për reformën zgjedhore.
Soreca u bën thirrje palëve që të vazhdojnë dialogun sa i takon ndryshimeve shtesë në Këshillin Politik me të njëjtën frymë gjithëpërfshirëse dhe bashkëpunuese, pasi nuk duhet të dëmtojë frymën dhe rezultatet e marrëveshjes së 5 qershorit.
Deklarata e Luigi Soreca
“Bashkimi Evropian mirëpret miratimin e ndryshimeve në Kodin Zgjedhor nga Kuvendi i Shqipërisë, në përputhje me marrëveshjen politike të arritur në 5 qershor. Kjo përmbush një nga kushtet kryesore për të filluar negociatat e pranimit në BE siç thuhet në konkluzionet e Këshillit më 25.3.2020. Dispozitat e reja legjislative do t’i japin Shqipërisë një kuadër zgjedhor me integritet dhe standarde transparence më të larta, bazuar në rekomandimet e OSBE/ODIHR-it. Ne jemi në dijeni të propozimeve shtesë për reformën e sistemit zgjedhor. Ndërkohë që njohim rolin e Parlamentit në paraqitjen e ndryshimeve shtesë në lidhje me sistemin zgjedhor, ne nxisim të gjitha palët të vazhdojnë diskutimet në Këshillin Politik me të njëjtën frymë gjithëpërfshirëse dhe bashkëpunuese, të treguar gjatë miratimit të marrëveshjes politike të 5 qershorit. Procesi që çon në ndryshimet shtesë nuk duhet të dëmtojë frymën dhe rezultatet e marrëveshjes së 5 qershorit.”, thuhet në mesazhin e Sorecës.
