Bashkimi Europian mund të përfundojë propozimin për krijimin e “qendrave kthimi” për migrantët e paligjshëm në mars, sipas deklaratës së kryeministrit suedez, Ulf Kristersson.
Kjo ka ardhur pas një takimi të tij me kancelarin austriak Karl Nehammer në Vjenë, të cilët kanë diskutuar për intensifikimin e përpjekjeve të BE-së në luftën kundër emigracionit të paligjshëm.
Të dy liderët janë të angazhuar për të avancuar një skemë që ngjan me marrëveshjen mes Shqipërisë dhe Italisë, ku migrantët e paligjshëm do të dërgohen në qendra jashtë BE-së.
Kristersson shpjegoi se propozimi për qendrat e kthimit do të finalizohet në pranverë, duke theksuar se është koha për të vepruar dhe jo për diskutime të panevojshme.
Kancelari austriak Nehammer gjithashtu përgëzoi iniciativën e Suedisë dhe theksoi rëndësinë e zgjidhjeve të përbashkëta për emigracionin, duke shtuar se vetëm një qasje e tillë mund të çojë në përparim.
