Policia belge ka kryer bastisje të njëkohshme në Shërbimin Diplomatik të Bashkimit Europian në Bruksel, në Kolegjin e Europës në Bruges dhe në disa banesa private, si pjesë e një hetimi penal mbi dyshimet për keqpërdorim të fondeve të BE-së. Euractiv, duke cituar persona të njohur me hetimin dhe dëshmitarë okularë, raportoi se bastisjet u zhvilluan në orët e para të së martës në zona të ndryshme të Belgjikës.
Autoritetet sekuestruan dokumente dhe arrestuan tre persona për t’i marrë në pyetje nën dyshimet për mashtrim me prokurimin, korrupsion dhe konflikt interesi. Sipas mediave ndërkombëtare, mes të arrestuarve ndodhet edhe rektorja e Kolegjit të Europës, Federica Mogherini.
Një dëshmitar tha se rreth dhjetë oficerë me rroba civile hynë në selinë e Shërbimit Evropian të Veprimit të Jashtëm në orën 7:30 të mëngjesit të së martës, ndërsa një zyrtar i BE-së konfirmoi bastisjen. Hetimi lidhet me akuzat se EEAS dhe Kolegji i Europës kanë keqpërdorur fonde publike të BE-së gjatë viteve 2021 dhe 2022, sipas katër personave të njohur me çështjen.
Ky është skandali më i fundit që trondit institucionet e Bashkimit Europian dhe pritet të shtojë presionin ndaj Kolegjit të Europës dhe drejtueses së tij, Federica Mogherini, e cila më parë ka drejtuar vetë EEAS-in dhe këtë vit nisi mandatin e dytë pesëvjeçar në krye të institucionit në Bruges.
