Në prag fushate një çështje mjaft shqetësuese është ringritur nga Shoqata e Energjisë së Rinovueshme. Në Kukës operojnë gjithësej 8 hisdrocentralë të cilët janë prekur drejtpërdrejt nga taksa e re, që sipas tyre është antiligjore dhe e padrejtë.
Kryetarja e Bordit Ekzekutiv të Shoqatës, Anita Shushku, në një intervistë për Euronews, e quan penalizim të bizneseve nga bashkia dhe njofton dërgimin në gjykatën administrative të kësaj takse.
“Në mënyrë të paprecedentë dhe të palogjikshme, këshilli bashkiak vendosi të penalizonte, të vendoset një tarifë që llogaritet në bazë të kapacitetit të hidrocentraleve. Duket se Bashkia e Kukësit si të thuash, aksionere e këtyre kompanive. Nga të gjitha këto aspekte mendojmë se është e padrejtë, antiligjore dhe nuk i shërben klimës së biznesit. Kjo nuk është as në shërbim të komunitetit, por vetëm një akt keqdashës”, shprehet znj. Shushku.
Kujtojmë se i gjithë problemi nisi më 24 dhjetor të vitit 2019, kur bashkia e Kukësit me vendim të Këshillit Bashkiak miratoi vendosjen e taksës për mbrojtjen dhe përmirësimin e mjedisit, saktësisht për “Subjeket Hidroenergjitike/mega” me një vlerë prej 400 mijë lekë të reja.
Sipas përfqaësuesve të shoqatës AREA, tarifa e re e vendosur nga Bashkia Kukës, është mesatarisht rreth 6-7 herë më e lartë se totali i të gjithë taksave e tarifave vendore së bashku të paguara nga subjektet Hidroenergjitike për vitin 2019. Rritja është mbi 700 % (shtatëqind për qind).
Ky fakt, thotë AREA tregon se sa abuziv dhe disproporcional është vendimi i Këshillit Bashkiak. Veç të tjerash, ai është në kundërshtim me kontratën koncesionare që kanë nënshkruar HEC-et, pasi në momentin e nënshkrimit të kontratës janë marrë në konsideratë të gjitha tarifat që kanë qenë në fuqi në atë moment. Në këtë mënyrë, kjo tarifë konsiderohet se mund të ndryshojë vetë termat e kontratës koncesionare.
Kjo taksë e paprecedentë, thotë AREA, rrit në mënyrë abuzive kostot e kompanive që kanë investuar miliarda dollarë për ndërtimin e impianteve të prodhimit të energjisë së rivonueshme. Vetëm kompanitë anëtare të AREA kanë investuar së paku 450 milionë euro për ndërtimin e HEC-eve.
