Kreu i Partisë Demokratike, Lulzim Basha ka pasur një takim të rëndësishëm me kryetaren e Lëvizjes Socialiste për Integrim, Monika Kryemadhi, në selinë e partisë së kësaj të fundit.
Pas përfundimit të takimi, Basha ka thënë se edhe një herë tjetër opozita e bashkuar vazhdon aksionet e saj kundër qeverisë dhe njëkohësisht ka lajmëruar edhe protestën e radhës.
Basha ka thënë se dita e nesërme do të jetë një ditë shumë e angazhuar, pasi në orën 11:00 do të ketë një prezantim nga koalicioni opozitar për planin rreth qeverisë tranzitore, ndërsa në orën 18:00 ashtu si edhe javën e kaluar do të ketë bllokim të akseve kryesore të vendit.
“Jemi në një krizë të thellë, politike kushtetuese, ekonomike dhe sociale dhe siç u bë e qartë dhe 24 orët e fundit dhe një krizë totale të integrimit në BE. Shkaku i kësaj krize është qeveria e lidhur me krimin që ka asgjësuar kushtetutën, demokracinë, zgjedhjet, themelin e llogaridhënies së qeverisë para qytetarëve që është vota e lirë. Ne do të vazhdojmë aksionin tonë në të gjitha planet. Nesër në orën 18:00 do të nisë aksioni në të gjithë vendin për bllokimin e disa aksve”, deklaroi Basha.
