Kryetari i Partisë Demokratike, Lulzim Basha, thotë se Edi Rama nuk shqetësohet për shpopullimin e Shqipërisë. Në rrjetet sociale, kreu i PD-së shtron pyetjen: “A është shqetësuar Edi Rama për shpopullimin që po pëson Shqipëria?”
Sipas tij, përgjigja është ‘Jo’. Në videon që publikon Lulzim Basha më tej, argumentohet se “Largimi masiv i shqiptarëve gjatë qeverisjes së tij nuk e shqetëson Ramën, madje ai i konsideron shqiptarët të zëvendësueshëm me popuj të tjerë”.
Një ditë më parë, kryeministri Edi Rama, teksa zhvilloi takim me një biznes fasonerie në Shkodër, tha se të huajt e bëjnë punën më mirë se shqiptarët, duke rekomanduar që të merren edhe punëtorë nga Bangladeshi apo Pakistani. Kjo deklaratë e kreut të qeverisë, nuk është pritur mirë nga shumica, që kanë reaguar kundër tij.
Biseda e Ramës ditën e djeshme me një pronar fasonerie:
Pronari: Nuk ka fuqi punëtore.
Rama: Unë e di që kjo është bisedë e rrezikshme për ne se na hidhen në fyt dhe pastaj kur u tregojmë këto thonë se kjo nuk është punë, është skllavëri, është poshtërsi. Më vjen shumë keq për ata që nuk kuptojnë por nuk kemi çfarë t’u bëjmë. Ne e kemi kaluar ligjin e ri për të huajt që është shumë i thjeshtë, nuk ka fare më ato procedurat e tmerrshme. 7 ditë është procedura për të marrë punëtorë të huaj dhe po të them me këtë pagë që ke ti e ke të garantuar, kanë filluar të marrin edhe të tjerët, punëtorët e huaj nga Bangladeshi, nga Pakistani, India.
Pronari: I kam porositur 300 në Bangladesh, 400 dollarë paga. E kanë të përfshirë edhe fjetjen.
Rama: I ke pronto, nuk dinë as shqip të merren me thashetheme.
