Ditën e djeshme IKMT ka ngritur padi pranë për kreun e Bashkisë së Kavajës dhe dy punonjës të tjerë për shpërdorim detyre dhe për këtë çështje ka reaguar edhe kreu i PD-së, Lulzim Basha.
Basha përmes një statusi në rrjetin e tij social, Facebook, e ka quajtur kallzimin penal ndaj Isa Sakjas si sulm politik të drejtpërdrejtë të kryeministrit Rama , i cili është i lidhur me krimin.
Gjithashtu kreu i demokratëve nuk është kursyer duke thënë se Rama mbron Vangjush Dakon që pasurinë publike iua dha kriminelëve dhe tani është duke marrë hak pasi qyetarët e Kavajës nuk pranuar të drejtohen nga përdhunues.
“As kallëzimet politike, as gazi lotsjellës, as propaganda nuk e ndihmojnë dot më Edi Ramën”, ka thënë ndër të tjera Basha.
DEKLARATA E BASHËS
Kallëzimi penal kundër Kryetarit të Bashkisë së Kavajës, Isa Sakja, është sulm politik kundër kundërshtarit politik, i parathënë nga Edi Rama disa javë më parë. Ky sulm politik është i orkestruar nga një kryeministër hakmarrës, që nuk e pranon dot se qytetarët në Kavajë nuk drejtohen më nga një përdhunues dhe trafikant droge apo grabitës pronash në bregdet.
Kallëzimi politik penal kundër Isa Sakjas vjen nga i njëjti kryeministër i korruptuar dhe i lidhur me krimin që vazhdon të mbrojë Vangjush Dakon, i cili betonizoi Durrësin dhe plazhin e tij, duke u dhënë pasuri publike kriminelëve me të cilët bleu votat. Kallëzimi është urdhëruar nga kryeministri i Qazim Sejdinit, që komandon trafikun e drogës në Elbasan dhe e ka bërë qytetin plaçkë betoni të bandave. Sulmi politik ndaj kryebashkiakut të Kavajës vjen nga i njëjti kryeministër që, bashkë me shërbëtorin e tij, Erion Veliaj, kanë betonizuar Tiranën, duke e shndërruar në lavatriçen më të madhe të pastrimit të parave në Ballkan.
As kallëzimet politike, as gazi lotsjellës, as propaganda nuk e ndihmojnë dot më Edi Ramën. Kryeministri më i korruptuar sot në Europë e ka humbur Kavajën dhe, shumë shpejt, ka për të humbur gjithë Shqipërinë!
