Kryedemokrati Lulzim Basha ka rikujtuar mëngjesin e sotëm një premtim të vjetër të kryeministrit Edi Rama. Ndërsa publikoi edhe njëherë raportin e “Transparency International”, Basha thotë se sipas këtij raporti Shqipëria është shtet i kapur nga korrupsioni.
Prej ditësh tashmë, lideri opozitar poston në rrjetet sociale çdo ditë nga një dështim në kuadër të fushatës së nisur “100 Dështimet e Ramës”.
“Rama premtoi luftë kundër korrupsionit. A e mbajti këtë premtim? Përgjigja është jo.”, shkruan Basha në “instastory”.
Kujtojmë se Organizata Transparency International dhe Instituti për Demokraci e Ndërmjetësim publikuan dje në Tiranë një raport mbi kapjen e shtetit, korrupsionin e lartë dhe ligjet me porosi.
Sipas raportit më të fundit, Shqipëria ka një shtet të kapur nga korrupsioni, ku individë të fuqishëm, institucione, kompani e grupe të fuqishme brenda e jashtë vendit, komplotojnë që politikat, mjedisi ligjor dhe ekonomia t’u shërbejë interesave të tyre private në dëm të publikut.
Studimi përfshin 12 vitet e fundit nga 2008-2020 dhe arrin në përfundimin se kapja e shtetit në Shqipëri është rritur ndjeshëm dhe se korrupsioni i nivelit të lartë nxitet nga privatizimi i pronës publike dhe i shërbimeve.
Ky raport mbështetet në një përmbledhje rastesh korrupsioni të nivelit të lartë, që kanë të bëjnë me rrjetet klienteliste, korrupsionin në sistemin gjyqësor edhe ligjet e bëra me porosi.
