Kryetari i Partisë Demokratike, Lulzim Basha në rrjetet sociale ka publikuar një pjesë të fjalës së tij, nga konferenca që zhvilloi ditën e sotme me gazetarët.
Kujtojmë se tema kryesore ishte ajo e vettingut në politikë dhe në mesazhin e tij Basha ka theksuar se çdo alibi kundër vettingut të politikanëve nxjerr zbuluar qëllimin e llumit të tranzicionit për ta mbajtur Shqipërinë peng. Basha ndër të tjera në mesazhin e tij ka thënë se nga politika nëpërmjet vettingut duhet të largohet çdo politikanë dhe nuk ka rëndësi në qoftë se ai është socialist, demokratë apo i ndonjë partie tjetër politike.
“I lind detyrimi që të dalin haptas para shqiptarëve duke pranuar këto propozime kushtetuese bashkërisht i mbyllim derën tranzicionit me vetëdijen më të plotë dhe qetësinë më të madhe se kushdo që meriton që përmes këtyre masave të largohet nga politika, duhet të largohet nga politika. S’ka rëndësi është socialist, demokrat, apo ndonjë partie tjetër.
Çdo alibi vetëm sa nxjerr zbuluar qëllimin e llumit të tranzicionit për ta mbajtur Shqipërinë peng. Peng të një klase politike të ndryshkur, të majmur, të zvetënuar, të dalë nga vetja dhe të shkëputur nga realiteti i përditshëm i shqiptarëve.
Ne refuzojmë të jemi pjesë e asaj klase politike.
Ky ka qenë lajtmotivi i gjithë qëndrimeve tona për dy vite.
Ndryshimi ka qenë kryefjala e fushatës tonë zgjedhore. Nuk ka masakër zgjedhore të na heqë ne nga misioni i ndryshimit.
Ndryshimi do të bëhet me çdo kosto.”, -thuhet në fjalimin e Bashës.
