Banesa e shkatërruar nga tërmeti i 26 nëntorit të 2019-ës, u dogj mbrëmjen e së enjtes. Djali 24 vjeçar i familjes Veseli nga Fushë-Miloti ka shpëtuar për mrekulli nga flakët që u përhapën me shpejtësi. Nëna e tij, Etleva Veseli tha se zjarri është shkaktuar nga një shkëndije elektrike.
“Nga elektriku, nga priza edhe ka kapur pjesën sipër tek bufeja komplet. Djali ka qenë tek soba këtu është ngritur në orën 06.00 të mëngjesit, se ka ikur i ati në punë. Kur ka parë flakën tek perdja, ka dalë në sekonda, ka qenë bllokuar komplet vendi. Dhe ka dalë duke thënë hajde se u djega”, shprehet nëna e djalit , Etleva Veseli
Në 30 dhjetor 2019, teksa banorët akoma nuk kishin mbledhur veten nga tërmeti shkatërrues i 26 nëntorit, Edi Rama bëri një premtim. “Brenda vitit 2020, të gjithë ata që sot jetojnë në fshat, që për arsye legjitime nuk janë spostuar në sistemin e qirave dhe thjesht kanë kërkuar një çadër dimërore në oborret e tyre, do të futen në shtëpi të reja. Asnjë nuk mundet dot ta lejojmë të kalojë vitin e ri 2021 në çadër”, deklaroi kryeministri Rama. Premtimi akoma nuk është mbajtur.
Tërmeti preku në mënyrë direkte dhe indirekte 202 mijë persona dhe që shkaktoi një bilanc me 51 viktima dhe 913 të plagosur. 11 bashki u prekën, duke përfshirë dy nga më të mëdhatë e të populluarat si Tirana dhe Durrësi.
