Kryeministri i Kosovës, Albin Kurti ka shprehur sërish qëndrimin e tij kundër minishengenit Ballkanik(i quajtur tashmë “Ballkani i Hapur”). Sjellim në vëmendje se disa ditë më parë Shqipëria, Serbia dhe Maqedonia e Veriut u bënë bashkë në nismën e quajtur “Ballkani i Hapur”, ajo që u vu re ishte mungesa e Kosovës. Kryeministri i Kosovës, Albin Kurti në një deklaratë për mediat u shpreh se Kosova, nuk mund të jetë pjesë e kësaj nisme përsa kohë presidenti serb Aleksandër Vuçiç nuk ballafaqohet me të kaluarën.
“Ne si Republikë e Kosovës konsiderojmë që problemi kryesor në Ballkanin Perëndimor është mosballafaqimi i kreut të Serbisë me të kaluarën. Përkatësisht me të kaluarën kriminale të Serbisë e cila i shkaktoi katër luftëra në dekadën e fundit të shekullit 20. Tregu i përbashkët duhet patjetër të shoqërohet me ballafaqimin me të kaluarën, me demokratizimin e vendeve tona dhe me sundimin e ligjit. Përndryshe do të kemi më shumë ngjarje që nuk ngelen në kujtesë sesa procese dhe struktura që ndryshojnë për së miri jetën e qytetarëve. Në veçanti nuk mund të them që jam i entuziazmuar me emërtimin ‘Ballkani i Hapur’ pasi duke qenë aty kreu i Serbisë që nuk ballafaqohet me të kaluarën e shtetit të tij dhe të vetes së tij, ‘Ballkani i Hapur’ ngjan më shumë si Ballkan i hapur për ndikimet nga Lindja, sidomos nga Federata Ruse dhe Kina, si dhe Ballkan i Hapur për autokracinë, korrupsionin, kriminelët e luftës, siç e dimë që vazhdojnë të jenë masivisht jo vetëm të lirë në Serbi, por jo pak prej tyre edhe në pushtet”, tha ai për mediat kosovare.
Ndër të tjera Kurti ka thënë se marrëdhëniet Kosovë-Shqipëri janë vëllazërore dhe ka thënë se do të vazhdojnë të qëndrojnë të tilla, pavarësisht politikave.
“Kosova dhe Shqipëria do t’i kenë e duhet t’i kenë marrëdhëniet e mira e gjithnjë e më të mira. Nuk i përket as kryeministrit të Kosovës e as atij të Shqipërisë që dy vendet tona që janë të një kombi që të kenë marrëdhënie jo të mira. Kosova dhe Shqipëria, qytetarët e të dyja vendeve i kanë marrëdhëniet vëllazërore, ndërkaq prej politikanëve, qofshin ato edhe prej kryeministrave si Edi Rama dhe puna ime mbetet vetëm ta përfaqësojnë këtë vullnet e interes të qytetarëve.”, ka thënë kryeministri i Kosovës, Albin Kurti.
