Këshilli Bashkiak i Vlorës, nuk tërhiqet nga kërkesa për ballafaqimin me kryebashkiakun e Vlorës, Dritan Leli. Me anë të një shkrese zyrtare ata kanë kërkuar që ballafaqimi të zhvillohet në datën 22 qershor të këtij viti. Mbledhja ishte parashikuar të zhvillohet ditën e djeshme, por kryebashkiaku Leli nuk u paraqit, me argumentin se nuk mund të mblidhen njerëz në sallë, duke shkelur masat kundër koronavirusit. Leli më anë të një kërkese drejtuar kryetares së këshillit ditën e djeshme kërkoi që mbledhja të zhvillohej online, në Zoom, por kjo kërkesë u refuzua nga Këshilli Bashkiak.
Gjithashtu në kërkesën që kanë dorëzuar për datën 22 qershor, këshilltarët kanë kërkuar që mbledhja të zhvillohet po në sallën e teatrit “Petro Marko”, në orën 10:00.
Këshilltarët kërkojnë që kryetari i Bashkisë të raportoj në lidhje me shqetësimet e komunitetit vlonjat, për gjendjen e shërbimeve vendore.
Këshilltarët kërkojnë:
- Të bëhet transparencë mbi vendimet e marra dhe urdhëruesit e pengimit të Këshillit Bashkiak për kryerjen e detyrës së tij në mbledhjen e parashikuar për t’u zhvilluar më datë 15 qershor 2021.
2. Raportim i Kryetarit të Bashkisë në lidhje me shqetësimet e komunitetit vlonjat për gjendjen e shërbimeve vendore, situatën e shërbimeve bazike të pastrimit, mirëmbajtjes, ndriçimit etj, si dhe trajtimin e ankesave të qytetarëve.
