Taulant Balla ka marrë pjesë ditën e sotme në një seancë pune pyetje-përgjigje në Komisionin e Politikës së Jashtme të Dhomës së Deputetëve dhe të Senatit Italian.
Me anë të një postimi në Facebook, kreu i Grupit Parlamentar të PS-së, tregon se ndau me politikanët e shtetit fqinj situatën shqetësuese të krizës politike në Shqipëri, ndërkohë që ngre sërish dyshimet e një skenari rus në Ballkan.
Sipas Ballës, nuk janë aspak të rastësishme protestat në të njëjtën ditë dhe orë, në disa vende të Ballkanit Perëndimor.
Ndër të tjera ai ka theksuar se ka vetëm një plan A, ai është integrimi në Bashkimin Europian, dhe se kjo aspiratë ka nevojë për mbështetjen e pazëvendësueshme të Italisë.
Postimi i plotë i Ballës:
Morëm pjesë në një seancë pune pyetje-përgjigje në Komisionin e Politikës së Jashtme të Dhomës së Deputetëve dhe të Senatit italian.
Duhet thënë që në fillim se të gjitha grupet politike në Parlamentin italian mbështesin fillimin e bisedimeve për anëtarësim e Shqipërisë në BE.
Natyrisht si miq të Shqipërisë deputetët italianë shprehën shqetësim për pamjet e protestave të dhunshme të opozitës që qarkullojnë në median italiane këto javë, shpeshherë edhe të sponsorizuara nga opozita shqiptare, që rrezikojnë të frenojnë turistët dhe investitorët italianë.
Në përgjigje theksova se e vetmja arsye që ne mund të japim për këto akte dhune të inspiruara nga lidershipi i opozitës, është frika më e madhe e opozitës nga zbatimi i reformës në drejtësi dhe vettingut, pasi drejtësia e re e pavarur që po krijohet nuk do të pyesë se kush je, apo çfarë pozicioni politik ke.
Lidhur me aktet e dhunës, Policia e Shtetit, me vendosmëri po vazhdon hetimet, për të zbardhur deri në fund të gjithë ngjarjet e fundit të dhunshme dhe individët fajtorë të përfshirë.
Aspak nuk janë të rastësishme protesta në të njëjtën ditë dhe orë, në disa vende të Ballkanit Perëndimor, sikurse dyshimet për financime të dyshimta me të partive të ndryshme politike në këto vende.
Por për ne ka vetëm një plan A, s’ka plan B: vetëm integrimi në Bashkimin Europian, që ka mbështetjen e 95% të shqiptarëve dhe se në këtë aspiratë tonën historike, mbështetja e Italisë është e pazëvendësueshme.
Qëndrimi i SHBA-së dhe i BE-së është i qartë: sjellja e opozitës është demokratikisht e papërgjegjshme, si dhe institucionalisht e ndërkombëtarisht e papranueshme. Opozita duhet të marrë pjesë në zgjedhjet lokale për shkak të përgjegjësisë së saj ndaj elektoratit, por nëse eventualisht vendosë të mos marrë pjesë, bojkoti i saj nuk dëmton cilësinë e zgjedhjeve.
Për SHBA-në, ashtu si edhe për Europën, thellimi i kursit të reformave që afrojnë vendin tonë më pranë BE-së është shumë më e rëndësishme se rruga e bojkotit e zgjedhur nga opozita.
