Gazetarja Klodiana Lala ka deklaruar se zëvendës kryeministrja Belinda Balluku ka pasur komunikime të dyfishta, si me kryeministrin Edi Rama ashtu edhe me ish vartësin e saj Evis Berberi, lidhur me tenderat. Sipas saj, në këto biseda del se Balluku përdorte ndaj Ramës nofka dhe terma jo etikë, të cilat ajo i ka të konfirmuara.
Lala theksoi se një nga çështjet që pritet të trajtohen në vijim nga SPAK është ajo e aeroportit të Vlorës, por ende nuk është e qartë nëse kjo do t’i faturohet Ballukut, pasi hetimi është në proces. Ajo shtoi se në komunikimet mes Ballukut dhe Berberit nënkuptohet qartë ekzistenca e këtyre kontakteve paralele me kryeministrin.
“E kam të konfirmuar këtë gjë, edhe pse disa prej nofkave të përdorura nuk qëndrojnë me thënë të drejtën. Çështja e radhës në SPAK por që nuk di a do t’i faturohet Ballukut është aeroporti i Vlorës”, u shpreh Lala.
Sipas saj, kryeministri Rama ka hezituar të distancohet menjëherë nga Balluku. Ajo kujtoi se për herë të parë, gjatë një interviste për Deutsche Welle, Rama përdori një gjuhë më të ftohtë dhe formale, ndryshe nga mënyra se si është shprehur më parë në raste që lidhen me Erion Veliajn apo Saimir Tahirin.
