Kevin Hajrulla, i cili shpëtoi nga atentati në Vlorë, ka mohuar se njeh ekzekutorët. Ai ka deklaruar se ka ndjerë erën e barutit në momentin që është qëlluar teksa po ngjitej në makinë, dhe më pas ka humbur ndjenjat.
Aktualisht, Hajrulla është në gjendje të përmirësuar shëndetësore dhe pretendon se nuk ka konflikte me persona të tjerë, duke shtuar se për një kohë të gjatë ka punuar në call center.
I pyetur për marrëdhëniet me kushëririn e tij, Inez Hajrulla, i cili është përfshirë në konflikte të forta me grupin e Bernard Sinomatit, Kevin ka sqaruar se ata takohen rrallë dhe vetëm në raste familjare. “Nuk shoqërohem me Inezin. Ndodh që takohemi në raste familjare”, ka pohuar ai.
Policia dyshon se atentati ndaj Kevin Hajrullës mund të ketë lidhje me përplasjet e kushëririt të tij, Inezit, me grupe të ndryshme kriminale. Pavarësisht se Kevin nuk ka rekorde kriminale, dyshohet se ai është bërë shënjestër për shkak të këtyre konflikteve.
Aktualisht, ai ndodhet në spital në gjendje të stabilizuar, pas tri ndërhyrjeve kirurgjikale.
Hetuesit ende nuk e kanë marrë në pyetje Hajrullën, pasi sipas sistemit TIMS, ai rezulton jashtë vendit. Grupi i Inez Hajrullës është përfshirë në disa përplasje, ku më e forta është me grupin e Bernard Sinomatit.
Konflikti mes tyre është acaruar më tej pas vrasjes me snajper të Gëzim Sinomatit, nipi i Bernard Sinomatit, në dhjetor të vitit 2023. Viktima ishte djali i Sokol Sinomatit, i njohur me nofkën “Buzëderri”, dhe ngjarja ende nuk është zbardhur.
Pas atentatit në Vlorë, ku mbetën të plagosur Kevin Hajrulla dhe një tjetër person, në Tiranë është tentuar të ekzekutohet Bernard Sinomati, duke e përshkallëzuar edhe më tej situatën mes grupeve rivale.
