Bilanci i atentatit me armë zjarri në Shkodër është rënduar. Pas vrasjes së Armando Palit, punonjës i IKMT-së dhe ish-anëtar i Këshillit Bashkiak, ka ndërruar jetë në spital edhe Geridon Kraja, i cili ishte mes tre të plagosurve.
Kraja, i njohur si shofer dhe truprojë i Erogen Vasos (Brajoviq), nuk mundi t’u mbijetojë plagëve të marra. Ngjarja e rëndë ndodhi pranë Bashkisë së Shkodrës, në një lokal afër shkollës “Kole Idromeno”, ku autorët hapën zjarr me kallashnikov.
Shënjestra e dyshuar e atentatit ishte Erogen Vaso, i cili mbeti i plagosur dhe ndodhet nën kujdes mjekësor. Vaso është vëllai i Denis Brajoviqit, i njohur edhe si Denis Bajri, i cili u ekstradua nga Dubai në korrik të këtij viti dhe akuzohet për një sërë veprash penale, përfshirë krime kundër personit, veprimtari në grup të strukturuar kriminal dhe armëmbajtje pa leje. Denis Bajri është konsideruar nga autoritetet si një person me rrezikshmëri të lartë shoqërore.
Nga breshëria e plumbave kanë mbetur të plagosur gjithashtu një grua dhe kamarieri i lokalit.
Autori i dyshuar i atentatit, Rakip Gila, rreth 28 vjeç, është prangosur nga Policia e Shkodrës pas një operacioni të shpejtë. Ai po merret në pyetje për të zbuluar motivet e plota dhe bashkëpunëtorët e mundshëm.
Hetimet vijojnë, ndërsa numri i viktimave nga ngjarja e sotme ka shkuar në dy dhe disa të tjerë luftojnë për jetën.
