Detaje të reja janë zbuluar në lidhje me atentatin e dështuar me armë zjarri ndaj dy personave në lagjen “Donika Kastrioti” në Berat.
Sipas informacionit, shënjestrat e atentatit, Antonio Merkaj dhe Apostol Dhëmbi, ndodheshin në afërsi të “Karaburant Merko”, kur një automjet tip Ford i zi ka qëlluar në drejtim të tyre.
Dy të rinjtë janë larguar me vrap, duke iu shmangur breshërisë së kallashnikovit që është shkrehur në ndjekje të tyre.
Atentatorët, dy vëllezërit Fatjon dhe Marko Maloku, të cilët janë banues në lagjen “Donika Kastrioti”, janë larguar me shpejtësi nga vendngjarja pas sulmit. Fatmirësisht, asnjë person nuk ka pësuar lëndime, përfshirë shënjestrat dhe kalimtarët e rastit.
Burime konfidenciale kanë raportuar se konflikti mes grupeve ka nisur për shkak të prishjes së pazareve të drogës në Greqi. Policia ka identifikuar autorët dhe është duke punuar për kapjen e tyre.
