Ashtu siç edhe është raportuar, mësuesit e Kosovës kanë vendosur që të futen në grevë për shkak të pagave të ulta që kishin dhe mesa duket qeveria është dorëzuar para kërkesave të tyre.
Haradinaj ka bërë të ditur se është vendosur tashmë që të bëjë një rritje page për arsimtarët me rreth 20 milionë euro në vit, pra konretisht rritja do jetë nga 534 euro në 597 për mësimdhënësit në shkolla të mesme, nga 479 në 525 për ata në arsimin fillor dhe nga 447 në 501 për ata që janë pjesë e nivelit parashkollor.
Kjo marrëveshje ka ardhur pas takimit të kryeministrit Haradinaj dhe përfaqësuesve të Sindikatës së Bashkuar të Arsimit, Shkencës dhe Kulturës (SBASHK), ditën e diel, prej nga edhe ka dalë vendimi.
Temë e vetme e takimit ka qenë greva në arsim, e nisur javën e kaluar, teksa mësimdhënësit janë të vendosur të mos punojnë derisa në Projektligjin për paga koeficientet e punëtorëve të arsimit nuk ngrihen me 30 për qind, transmeton Express.
Ajo që e ka detyruar qeverinë të marrë këtë vendim kanë qenë paralajmërimet e shpeshta se arsimtarët do ta vazhdonin grevën edhe këtë javë, mirëpo pas përfundimit të takimit Haradinaj ka thëë në një konferencë për mediat se:
“Sapo i jam drejtuar me një letër kryetarit të SBASHK’ut, Rrahman Jasharit, që të shkojë ta takojë urgjent këshillin grevist dhe nesër të fillojë mësimi”, është shprehur ai.
Para gazetarëve, ai ka thënë se Qeveria ka rritur pagat për arsimtarët për 20 milionë euro në vit.
Haradinaj ka thënë se u ka kërkuar SBASHK’ut që nesër (e hënë) të rinisë mësimi dhe se kjo është maksimumi që qeveria mund të bëjë në këto moment.
“Ekziston një rrezik dhe rrezik është ky: Nëse Këshilli Grevist vazhdon ta mbajë grevën, me bindjen se kjo mund të jetë një ofertë e pastaj vjen një tjetër. Në fakt nuk kemi oferta tjera, është e pamundur të shkojë një ofertë të re. Ata që ju japin këshilla, që tash duke e vazhduar presionin mund të ndodhë edhe një ofertë, i bëjnë kalkulimet gabim”, ka thënë ai.
