Ditën e sotme dy pikat kufitare që bëjnë të mundur kalimin drejt shtetit Helen njoftuan pezullimin e punës.
Dogana e Kakavijës dhe Kapshticës mbyllën sportelet e punës menjëherë pasi përmbushën kuotën e numrit të lejuar të personave për të kalur kufirin. Por një lajm i tillë ngjalli shumë kaos dhe tensione te qytetarët që prisnin në rradhë prej më shumë se 4 ditëve.
Por falë negociatave të autoriteteve shqiptare dhe palës greke është arritur marrëveshja që puna të vijojë edhe gjatë ditës së sotme deri në orën 22:00.
Lajmin e bëri të ditur ministrja e Mbrojtjes Olta Xhaçka, e cila tha se masat kufizuese do të vijojnë pas ditës së nesërme.
“Kakavija dhe Kapshtica do të qëndrojnë hapur deri në orën 22:00. Risjellim në vëmendje që nesër nis kufizimi i ri nga pala greke duke vendosur kuota dhe kërkesa për formular dhe test negativ. Qytetarët të mos paraqiten nesër në Kakavijë e Kapshticë pa formularin dhe testin negativ”, shkruan Xhaçka.
Kujtojmë se nga data 17 gusht 2020, nga pika kufitare e Kakavijës do të kenë mundësi të kalojnë vetëm 750 persona në ditë, ndërsa nga ajo e Kapshticës vetëm 300 persona në ditë, në fashën orare 06:00 deri në orën 22:00, konform rregullave të vendosura nga pala greke, si pasojë e situatës së krijuar nga COVID-19.
