Në orën 5 të mëngjesit të sotëm liderët e Bashkimit Europian arritën marrëveshjen historike për buxhetin dhe planin e rimëkëmbjes pas pandemisë së koronavirusit. Negociatat u mbyllën kur samiti kishte hyrë në ditën e pestë, duke u bërë një prej më të gjatëve në historinë e BE-së.
750 miliardë euro është përcaktuar paketa e ndihmës, por nga këto 390 miliardë euro do të jepen si grante për shtetet anëtare dhe 360 miliardë euro janë kredi. Marrëveshja u arrit pasi Italia, Spanja, Gjermania dhe Franca pranuan kërkesën e “katërshes kursimtare”: Holandë, Danimarkë, Suedi dhe Austri, për të ulur shifrën e grantit që do të jepet për shtetet e goditura nga COVID dhe që nuk do të kthehet mbrapsht.
Ndërkohë, 1.074 trilion euro janë përcaktuar për buxhetin shtatë vjeçar të Bashkimit Evropian, çka e çon faturën përfundimtare në 1.82 trilion euro.
