Kreu i Partisë Socialdemokrate të Kosovës (PSD), Dardan Molliqaj, i cili është edhe bashkëshorti i ish-ministres së Arsimit në Shqipëri, Besa Shahinit, është arrestuar mesditën e sotme me dhunë nga Policia e Kosovës.
E gjithë ngjarja ndodhi pasi përfaqësues të Partisë Socialdemokrate kanë protestuar sot para Stacionit të Policisë së Kosovës.
Mësohet se aktivistët dhe pjesëtarët e kësaj partie, kanë shkruar me grafit në murin e institucionit të Drjetorisë së Përegjithshme të Policisë së Kosovës, parulla si: “Për partitë tubime, për qytetarët dënime”.
Pas këtyre shkrimeve në muret e institucionit, ka pasur një konflikt mes aktivistëve të PSD-së dhe efektivëve të policisë, të cilat kanë përfunduar me arrestime të disa personave.
Në disa pamje të publikuara, shihet se është arrestuar në mënyrë të dhunshme vet kryetari i PSD-së, Dardan Molliqaj.
Pas ikjes nga Lëvizja Vetëvendosje, ku ai ishte Sekretar Organizativ, Dardan Molliqaj së bashku me të pakënaqur të tjerë nga Vetëvendosja, u larguan për të krijuar një parti të re, PSD-në, ku ai u bë kryetar i saj.
Kujtojmë se kreu i PSD-së, Dardan Molliqaj, ka patur edhe konflikte të tjera edhe në studio televizive me anëtarë të partive të tjera politike të Kosovës.
Rasti i fundit ka qenë incidenti dhe sherri me grushta me ish-zëvendëskryeministrin e Kosovës, anëtarin e Lëvizjes Vetëvendosje, Haki Abazin.
Sherri mes tyre ndodhi pas u ofenduan me njëri-tjetrin në studion televizive të emisionit “Pressing” në televizionin T7./Gazetareforma.com/
