Policia greke ka arrestuar Mekel Selimajn, 46 vjeç, me origjinë nga Vlora, i dyshuar si autori i një vrasjeje të ndodhur në periferi të Athinës.
Viktima është Altin Arapaj, 41 vjeç, shtetas shqiptar, trupi i të cilit u gjet pranë një vreshti në zonën e Rafinës.
Ngjarja ka ndodhur mbrëmjen e së martës në Artemidë. Sipas të dhënave paraprake, Arapaj, Selimaj dhe dy persona të tjerë ishin takuar për arsye ende të paqarta.
Të katërt hipën në një makinë që drejtohej nga Selimaj dhe udhëtuan deri në një kryqëzim në Rafinë, në rrugët Pefkon dhe Arionos. Pikërisht aty ndodhi edhe krimi, Selimaj nxori armën dhe qëlloi Arapajn në fytyrë.
Pavarësisht plagës së rëndë, Arapaj arriti të largohej në këmbë nga vendi i ngjarjes dhe të kontaktonte bashkëshorten, të cilës i tha emrin e autorit të sulmit. Pak çaste më pas, ai ndërroi jetë si pasojë e plagës.
Hetimet kanë zbuluar se si viktima, ashtu edhe i dyshuari, ishin të njohur më herët për policinë dhe kishin precedentë penalë të lidhur me veprimtari të paligjshme në fushën e narkotikëve.
