Dy persona kanë rënë në prangat e Policisë së Tiranës, ndërsa një i tretë është shpallur në kërkim, pas një incidenti të rëndë me armë zjarri në rrugën “Tafaj”.
Të tre janë vëllezër dhe dyshohet se pas një sherri për motive të dobëta në rrugë, kanë kërcënuar një 30-vjeçar me armë.
Ngjarja alarmoi kalimtarët, ndërsa strukturat e Komisariatit Nr. 4 dhe Forca e Posaçme “Shqiponja” ndërhynë menjëherë, duke organizuar operacionin policor të koduar “Triangle”.
Si rezultat, u arrestuan A. M., 41 vjeç dhe R. M., 46 vjeç, ndërsa vijon puna për kapjen e vëllait të tyre, G. M., 45 vjeç.
Hetimet e deritanishme tregojnë se pas konfliktit verbal me të riun, tre vëllezërit e kanë kërcënuar atë me armë zjarri.
Më pas, gjatë kontrollit në banesat e dy të arrestuarve në zonën e Tufinës, u gjetën dhe sekuestruan 3 armë zjarri tip pistoletë si dhe sasi municioni luftarak.
Materialet për këtë rast iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
