Prokuroria e Korçës ka dhënë detaje pas arrestimit të kryekomisarit të Policisë Shkencore, Fatmir Balaj. Nga të dhënat e deritanishme, Balaj akuzohet se ka fshehur, tjetërsuar dhe zëvendësuar pajisje kompjuterike, të cilat do të shërbenin si provë kryesore shkencore në një çështje që kishte të bënte me “call centerat”. Gjatë hetimeve që kishin nisur për këtë “call centre”, dy USB-ve u nxorrën materiale me interes për hetimin nga ana e Prokurorisë, por për shkak të volumit të madh u dërguan për ekspertim më të detajuar pranë Institutit të Policisë Shkencore Tiranë. Atje ku edhe punonte Balaj.
Vetëm pak ditë më vonë, Instituti i Policisë Shkencore dërgoi aktin e ekpertimit, ku theksohet se dy USB-të e sekuestruara nuk kanë memorie dhe të dhënat që kanë pasur, janë të parikuperueshme. Kjo përgjigje e Institutit të Policisë Shkencore ngjallën dyshime tek Prokuroria e Korçës, kështu që riinspektuan edhe njëherë USB-të, duke dalë më pas në përfundimin se nuk ishin të njëjtat.
“Një nga detajet që vërtetoi dyshimet e ngritura është se njëra prej USB-ve e markës HP e sekuestuar, me kapacitet 64 GB, sipas kqyrjes së bërë në datën e sekuestros, nuk rezulton të jetë e njëjta me atë të ekspertuar dhe të dërguar nga ana e ekspertit kriminalist pasi edhe nga krahasimi i pamjes së jashtme ka rezultuar se ka pasur pas një mbishkrim tjetër dhe konkretisht ka pasur mbishkrimin HP 64 GB dhe version 3.0,”-shkruhet në njoftimin e Prokurorisë.
Kështu, pas këtyre gjetjeve, Gjykata e Korçës ka caktuar ndaj oficerit masën e sigurisë “arrest me burg”, duke e vendosur nën akuzë për 2 vepra penale, “Shpërdorim detyre” dhe “Ekspertim i rremë”.
NJOFTIMI I PLOTË:
Prokuroria pranë Gjykatës së Shkallës së Parë të Juridiksionit të Përgjithshëm, Korçë kërkoi caktimin e masës së sigurimit ‘Arrest në burg’ për shtetasin F.B., Ekspert i ekzaminimeve kompjuterike pranë Institutit të Policisë Shkencore, Tiranë. Kërkesa për këtë masë sigurie erdhi pasi prokuroria ra në gjurmët e mashtrimeve gjatë hetimeve në kuadër të procedimit penal nr. 1875, i datës 29.12.2023 për ‘Mashtrim kompjuterik’, “Pastrim i produkteve të veprës penale ose veprimtarisë kriminale” si dhe “Punësim i paligjshëm” parashikuar nga nenet 143/b/2, 287/2 dhe 170/a i K.Penal.
Gjatë ndalimit të një shtetasi për këto vepra penale, u sekuestruan ndër të tjera dhe USB-të e markës IIP ngjyre gri metalike 64GB dhe e markes Philips me ngjyrë të bardhë dhe bojëqielli 16GB. Nga kqyrja e pjesshme e këtyre dy USB-ve u nxorrën materiale me interes për hetimin nga ana e prokurorisë, por për shkak të volumit të madh, ato u dërguan për ekspertim të detajuar në Institutin e Policisë Shkencore Tiranë. Por para dërgimit, Prokuroria realizoi kopjimin e tyre paraprakisht në format CD si dhe mbajti procesverbalin përkatës. Vetëm pak ditë më vonë, Instituti i Policisë Shkencore dërgoi aktin e ekpertimit, ku theksohet se dy USB-të e sekuestruara nuk ruajnë në memorien e tyre të dhëna aktuale apo të dhëna që mund të rikuperohen.
Pas hetimit të prokurorisë, Gjykata caktoi si masë sigurimi ndaj personit nën hetim F.B. “Arrest në burg” parashikuar nga neni 238 i K. Pr. Penale, i dyshuar për kryerjen e veprave penale të “Shpërdorimi i detyrës” dhe “Ekspertimi i rremë”, parashikuar nga neni 248 dhe 309 i K. Penal.
