Shtetet e Bashkuara të Amerikës mbështesin përpjekjet e SPAK-ut kundër korrupsionit të nivelit të lartë.
Ky është reagimi i Departamentit Amerikan të Shtetit në lidhje me arrestimin e ish-presidentit të Shqipërisë, Ilir Meta.
“Jemi në dijeni të arrestimit. Ju referojmë tek autoritetet shqiptare për detaje të mëtejshme në lidhje me rastin. Shtetet e Bashkuara mbështesin përparimin e Shqipërisë drejt sundimit të ligjit, përfshirë përpjekjet e SPAK-ut për të ndjekur penalisht korrupsionin e nivelit të lartë dhe krimin e organizuar, në përputhje me ligjin”, shprehet një zëdhënës i Departamentit të Shtetit në përgjigje të interesimit të Zërit të Amerikës.
Meta, u arrestua të hënën me urdhër të Strukturës së Posaçme kundër Korrupsionit dhe Krimit të Organizuar.
Mbi të, hetimi është bazuar në tre dyshime, të cilat i konfirmoi dhe avokati mbrojtës Genc Gjokutaj.
Bëhet fjalë për: korrupsion, pastrim i produkteve dhe mosdeklarim i pasurisë.
Me këto të fundit, sipas tij, është marrë bashkëshortja e tij Monika Kryemadhi.
Ndaj Kryemadhit, u lëshua po ashtu një masë detyrim paraqitje.
Sakaq, ndaj Pirro Xhixhos u vendos masa arrest shtëpie në mungesë, ndërsa Ema Çoku është lënë në detyrim paraqitje.
