Pas aksionit ndaj kompanisë “Bankers Petroleum”, e akuzuar për shmangie të taksave për një periudhë prej afro 20 vitesh, ka reaguar Sindikata e Sektorit të Hidrokarbureve, e cila kërkon garanci për të drejtat dhe sigurinë e punonjësve.
Dritan Shahu, kreu i Sindikatës së Naftëtarëve, u shpreh se prioriteti i tyre është që hetimet dhe masat ndaj kompanisë të mos prekin pozitat e punëtorëve.
“Duam të sigurohemi që funksionimi i kompanisë të mos cënojë të ardhmen e punonjësve,” theksoi ai.
Shahu gjithashtu kërkoi transparencë nga institucionet shtetërore dhe drejtuesit e “Bankers Petroleum”, duke bërë me dije se sindikata ka kërkuar zyrtarisht informacion dhe është në pritje të një përgjigjeje nga kompania.
Ai kujtoi gjithashtu se ka pasur probleme të përsëritura me pagat e punonjësve, të cilët nuk janë trajtuar sipas kritereve të statusit të naftëtarit.
“Kompania ka pretenduar pamundësi financiare, por ne besojmë se paga e punonjësve duhet të jetë në nivelin e sektorëve të tjerë me të njëjtin profil,” u shpreh Shahu.
Në përfundim, kreu i sindikatës theksoi se do të kërkojnë me çdo mjet zbatimin e detyrimeve financiare dhe kontraktuale të kompanisë ndaj punonjësve, pavarësisht zhvillimeve të mëtejshme.
