Ministria e Drejtësisë ka shkarkuar nga detyra drejtorin e Institucionit të Ekzekutimit të Vendimeve Penale në Durrës, Indrit Cerloj, një ditë pas arratisjes së të dënuarit Altin Ndoci nga ambientet e spitalit ku ai ishte dërguar për një vizitë mjekësore.
Vendimi vjen pas ngjarjes së ndodhur, e cilësuar si një arratisje spektakolare, e cila ka ngritur shqetësime serioze mbi mënyrën e shoqërimit dhe masat e sigurisë gjatë transportimit të të burgosurve për trajtim shëndetësor.
Paralelisht, Drejtoria e Përgjithshme e Burgjeve ka ndërmarrë masa administrative dhe ligjore, duke pezulluar të gjithë zinxhirin komandues të burgut të Durrësit si dhe disa punonjës të Policisë së Burgjeve, të shërbimit shëndetësor dhe staf të tjerë që ishin të përfshirë në shoqërimin e Altin Ndocit.
Sipas njoftimit zyrtar, janë pezulluar nga detyra:
- Afrim Zeqiraj, Shef i Policisë
- Dezdemon Pazaj, Shef i Policisë IEVP Durrës (i komanduar)
- Ylfete Sema, Shefe e Shërbimit të Kujdesit Shëndetësor
- Aulon Quku, Kryeinfermier
- Dorjan Saraçi, punonjës i Policisë së Burgjeve
- Sali Ferrollari, punonjës i Policisë së Burgjeve
- Preng Marvataj, punonjës i Policisë së Burgjeve
- Fatjon Braçi, punonjës i Policisë së Burgjeve
- Idajet Calamaj, punonjës i Policisë së Burgjeve
- Aranit Çela, punonjës i Policisë së Burgjeve
- Violeta Uka, punonjëse e Policisë së Burgjeve
Në vijim të hetimeve dhe veprimeve të ndërmarra, Drejtoria e Përgjithshme e Burgjeve, në bashkëpunim me Shërbimin e Kontrollit të Brendshëm në Sistemin e Burgjeve dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Durrës, ka vendosur ndalimin e disa shtetasve të përfshirë në këtë ngjarje.
Konkretisht, janë ndaluar:
- Komisar Dezdemon Pazaj, punonjës i Policisë së Burgjeve
- Komisar Violeta Uka, punonjëse e Policisë së Burgjeve
- Kryeinspektor Dorjan Saraçi, punonjës i Policisë së Burgjeve
- Inspektor Sali Ferrollari, punonjës i Policisë së Burgjeve
- Inspektor Fatjon Braçi, punonjës i Policisë së Burgjeve
- Inspektor Preng Marvataj, punonjës i Policisë së Burgjeve
- Kryeinspektor Aranit Çela, punonjës i Policisë së Burgjeve
- Kryeinfermier Aulon Quku, punonjës i IEVP Durrës
Hetimet për zbardhjen e plotë të rrethanave të arratisjes së Altin Ndocit vijojnë, ndërsa autoritetet pritet të dalin me të tjera vendime pas përfundimit të verifikimeve.
