Sulmuesi shqiptar, Armando Broja, ka shkëlqyer së fundmi me paraqitjet e tij. Produkt i akademisë së gjigantëve anglez, Chelsea, Broja po tërheq shumë interes edhe nga ekipe të tjera.
Sezonin e shkuar, ishte i huazuar te Vitesse në Holandë dhe këtë sezon shpresonte të qëndronte tek ekipi mëmë. Dëshira për të qëndruar te Chelsea është e madhe, por Armando Broja pritet të huazohet sërish pas aventurës te Vitesse në Eredivisie.
Sulmuesi i talentuar shqiptar, është paraqitur shumë mirë në miqësoret e verës me kampionët e Evropës, por te Chelsea mendojnë se i duhet edhe pak eksperiencë për të qenë gati për ekipin e parë.
Interesimi për 19-vjeçarin kuqezi nuk mungon, me disa klube e pëlqejnë. Së fundmi, në garë është futur edhe ekipi italian, Udinese. Eksperti i merkatos dhe gazetari i Sky Sport në Itali, Fabrizio Romano, shkruan se bardhezinjtë italianë kërkojnë të marrin sulmuesin e kombëtares kuqezi në huazim për sezonin e ri.
Drejtuesit e Udineses po bisedojnë me homologët e “Bluve të Londrës” dhe Armando Broja pritet të jetë shqiptari i radhës që do të luajë në Serie A, pas emrave të shumtë si Marash Kumbulla, Elseid Hysaj, Etrit Berisha, Vedat Muriqi e të tjerë. Mbetet për t’u parë nëse ky transferim do të finalizohet…
