Arkiva fotografike e studios së parë shqiptare, themeluar nga Pietro dhe Kel Marubi, është përfshirë zyrtarisht në Regjistrin Ndërkombëtar “Memory of the World” të UNESCO-s – një njohje ndërkombëtare për vlerën unike historike dhe kulturore të kësaj pasurie.
Drejtori i Muzeut Kombëtar të Fotografisë “Marubi”, Luçjan Bedeni, e cilësoi këtë si një nga nderimet më të mëdha që i është bërë trashëgimisë sonë kulturore, duke e përshkruar si një moment historik për Shqipërinë dhe veçanërisht për qytetin e Shkodrës.
“Nga zemra e Shkodrës, kjo pasuri e rrallë fotografike që pasqyron jetën, historinë dhe shpirtin e shqiptarëve, shpallet trashëgimi botërore. Nuk është vetëm një vlerësim për kontributin e familjes Marubi, por edhe për Shkodrën qytetin që i dha frymë artit dhe kujtesës kombëtare,” u shpreh Ministria e Kulturës në një reagim publik.
Për herë të parë, Shkodra hyn në kujtesën botërore të njerëzimit me një trashëgimi që përfaqëson jo vetëm artin e fotografisë, por edhe identitetin e një kombi.
