Ministri për Pushtetin Vendor, Arbjan Mazniku, është marrë sot në pyetje nga Prokuroria e Tiranës në lidhje me një hetim për shpërdorim detyre.
Kallëzimi për këtë çështje është bërë nga Drejtuesi Politik i Partisë Demokratike në Tiranë, Belind Këlliçi.
Ky hetim ka të bëjë me një denoncim të bërë disa javë më parë nga Këlliçi, lidhur me një tender për ndërtimin e rrugës “Xhon Belushi” në Tiranë.
Këlliçi ka pretenduar se ky tender ishte fiktiv dhe paratë ishin shpenzuar për punime që kryheshin nga makineritë e bashkisë. Vlera e tenderit, sipas tij, ishte 420 milionë lekë, por punimet nuk u kryen nga një fitues i tenderit të ligjshëm.
Pasi Partia Demokratike denoncoi këtë aferë, bashkia e Tiranës e anuloi tenderin, ndërkohë që kryebashkiaku Erion Veliaj e justifikoi anulimin duke thënë se ky ishte një vendim i marrë më herët dhe se rruga do të ndërtohej me financime nga ndërmarrja publike.
Ai shtoi se Ujësjellësi kishte përfunduar procedurat dhe kishte nevojë për ndërhyrje.
