Ditën e sotme, teksa po zhvillohet seanca plenare, para Parlamentit “Lëvizja Bashkë” drejtuar nga Arlind Qori ka zhvilluar një protestë kundër rritjes së pagave për pushtetarët.
Ish-ministri i Financave Arben Ahmetaj është sulmuar nga mbështetës të “Lëvizjes Bashkë” teksa ecte në drejtim të Parlamentit ku ligjvënësit janë mbledhur në seancën plenare të së enjtes.
Siç duket dhe nga pamjet disa mbështetës së Lëvizjes Bashkë, të cilët kanë dalë sot në protestë kundër projektligjit për rritjen e pagave, hedhin “kartëmonedha” në drejtim të ish-zv/kryeministrit.
Aktivistët e kanë shoqëruar aktin me thirrjet “Mos hyr në parlament o hajdut, turp, jeni të korruptuar!”. Theksojmë se “Lëvizja Bashkë” e Arlind Qorrit ka thirrur sot një protestë para parlamentit me parullën “Mos u ngopshi”, teksa Kuvendi pritet që të miratojë sot rritjen e pagave për presidentin, kryeministrin, ministrat, deputetë dhe të gjitha nivelet e administratës publike.
“Në Shqipërinë tonë pensioni minimal është sa askund tjetër në Europë, vetëm 80 mijë lekë të vjetra. Pensioni mesatar në qytet është 150 mijë lekë të vjetra. Unë bëra një llogari dhe rroga e deputetit do të jetë sa 39 herë më e lartë pensionet minimale, sa 21 pensionet mesatare. Ky është skandal i padëgjuar ndonjëherë në asnjë vend. Një deputet merr rrogë 6-7 herë më të lartë se një polic”, deklaroi Arlind Qori në protestë.
