Ditën e sotme zgjatja e vizave amerikane për shtetasit shqiptarë nga 3 në 10 vjet, por dhe lehtësimi i masave anti-Covid për të udhëtuar drejt Shteteve të Bashkuara ka rritur numrin e aplikimeve, por dhe të fluksit në pritje për intervista. Ambasada e Shteteve të Bashkuara njofton të gjithë qytetarët që kanë raste urgjente për të udhëtuar drejt SHBA se mund të kërkojnë proces të përshpejtuar.
Ambasadorja e SHBA-ve në Tiranë Yuri Kim shprehet se të gjithë ata që kërkojnë përshpejtim të kësaj procedure mund të aplikojnë në konsullatë, si dhe të informohen në adresën e veçantë të krijuar specifikisht për këto raste.
“Pas shpalljes së vizave 10-vjeçare të Shteteve të Bashkuara të Amerikës për shqiptarët dhe lehtësimit të kufizimeve të COVID-it në udhëtime, ka pasur rritje të aplikimeve për viza, gjë që ka sjellë pritje të gjata për intervista.
Ne e dimë se kjo është frustruese dhe stafi ynë konsullor po punon fort për të shkurtuar kohën e pritjes. Në raste urgjencash të vërteta (për shembull trajtim mjekësor, vdekje familjare, programe studentore ose shkëmbimi me afate të caktuara) ju lutemi kërkoni proces të përshpejtuar kur të aplikoni. Ju gjithashtu mund të shkruani në adresën [email protected] pasi të keni bërë kërkesën për proces të përshpejtuar,” shkruan ambasadorja e Shteteve të Bashkuara Yuri Kim.
Nga data 1 prill 2022 vlefshmëria e vizave turistike apo për biznes që shqiptarët do të marrin për në SHBA ka vlefshmëri 10-vjeçare. Vendimi u bë i ditur në 28 mars nga ambasada amerikane në Tiranë.
