Rrjetet kriminale nuk janë mjaftuar vetëm me “SkyEcc” dhe “EncroChat”.
Aplikacioni më i ri, “Matrix” i përdorur nga kriminelët për të kryer porosi, si vrasje, trafikun e drogës, të armëve dhe pastrimin e parave.
Europol ka konfirmuar se janë zbuluar mbi 2.3 milionë mesazhe të deshifruara në 33 gjuhë të ndryshme.
Ish-prokurori, Bledar Bejko, thekson se komunikimet në aplikacionin Matrix mund të shërbejnë si prova të vlefshme për hetimet.
“Një pjesë duan ta trajtojnë si përgjim, një pjesë po e trajtojnë si dokument, ku në rastin e parë përgjimi është një mjet për kërkimin e provës, ndërsa dokumenti është provë në vetvete. Janë gjetur këto telefona, është konstatuar që janë telefona që përdoren kryesisht nga individë të cilët i përdorin për vepra penale të rënda dhe në funksion të hetimit është vendosur ky përgjim. Bazuar në marrëveshje, konventa, raporte të Eurojust është i ligjshëm. Gjykata Kushtetues nuk mund ta quaj të pavlefshëm pasi informacioni i marrë është harmonizuar dhe ka dalë i vërtet me provat e tjera”, thotë Bejko.
Ndërsa eksperti i teknologjisë, Edmond Liçaj shpjegon për Euronews të veçantat e këtij aplikacioni që e bëjnë të ndryshëm nga platformat e tjera.
“Është një aplikacion i ndërtuar dhe i zhvilluar nga grupet kriminal, nuk është një aplikacion me përdorim të gjerë. Na të dhënat që janë deri më tani janë rreth 8000 përdorues në të gjithë botën. Aplikacioni ka funksionuar me ftesë nga brenda ose nga zhvilluesit e aplikacionit. Pagesa e pajisjes, nga 1360-1700 dollarë shkonin këto pajisje”, tregon Liçaj.
