Teksa Apeli i GJKKO vendosi sot të mbajë në qeli Fredi Belerin, një reagim direkt ka ardhur nga Ministria e Punëve të Jashtme në Greqi. Në reagim Athina zyrtare thekson se vendimi është kundër dispozitave të shtetit.
Në deklaratë thuhet: Vendimi refuzues i sotëm ndaj Apelit të Kryetarit të zgjedhur të Bashkisë së Himarës, Fredi Beleri dhe lënia në paraburgim nuk rezulton të përputhet me dispozitat e shtetit të së drejtës, si dhe nuk është trajtim i drejtë i një përfaqësuesi të zgjedhur të pushtetit lokal, pasi, siç vihet re nga Njoftimi i Gjykatës së Posaçme të Shqipërisë është i vetmi i arrestuar në 31 akuza të ngritura për shkelje të rregullores zgjedhore. Vendimi gjithashtu ngre pikëpyetje për ekzistencën e arsyeve politike në mbajtjen në paraburgim, pasi shkakton pengesa esenciale në marrjen e detyrës si kryebashkiak.
Ndërkohë paraburgimi i Belerit ishte objekti i diskutimit të sotëm mes ministrit të Jashtëm grek, Vasilis Kaskarelis dhe homologes shqiptare, Olta Xhaçka në Oslo, në kuadrin e takimit jo formal të ministrave të Jashtëm të NATO-s.
Arrestimi i Fredi Belerit ka ngjallur disa reagime të forta nga vendi fqinj, Greqia. Vetë kryeministri grek në një deklaratë zyrtare paralajmëroi se nëse nuk merren masa për lirimin e Belerit, Greqia do të bëhet pengesë për integrimin e Shqipërisë në Bashkimin Europian.
