Gjykata e Posaçme ka konfirmuar vendimin e fajësisë për Arben Lenën, ish-drejtuesin e Avokatisë së Korçës, duke e dënuar me 2 vite burg për “ushtrim të ndikimit të paligjshëm ndaj personave që ushtrojnë funksione publike”, kryer në bashkëpunim.
Përveç dënimit me burg, ai nuk do të mund të ushtrojë funksione publike për një periudhë 3-vjeçare.
Lena u arrestua në fillim të vitit me akuzën se kishte tentuar të ndërhynte në Gjykatën e Apelit të Korçës për të siguruar lirimin e një të ndaluari për trafikim klandestinësh.
Në maj, masa e tij e sigurisë u zbut dhe ai u vendos në arrest shtëpie.
Në të njëjtën çështje, Nikolla Hafësllari dhe Nikolla Jesku u dënuan me nga 1 vit burg secili, ndërsa Dajana Kodra u dënua me shërbim prove.
Dritan Tabaku u shpall i pafajshëm për akuzën e moskallëzimit të krimit. Ndërkohë, Blerand Koziçi u dënua me 1 vit e 4 muaj burg, kurse Artiana Koziçi mori një dënim prej 8 muajsh, me vuajtje të pezulluar me kusht.
Sipas SPAK, të gjithë këta persona dyshohet se kanë bashkëpunuar për të ndikuar në procesin gjyqësor të Blerand Koziçit, i cili ishte i dënuar për trafikim të paligjshëm të emigrantëve.
