‘Rikthim në vitin 1997’, e ka cilësuar gazetari Artan Hoxha ngjarjen e rëndë ku u qëllua me breshëri kallashnikovi ndaj një studenti të Akademisë së Policisë, Gjergj Ndërshtiqaj, dhe kunatit të tij, Gjon Nika. Ngjarja ndodhi mbrëmjen e 13 marsit në Grudë të Re, në Shkodër. Në emisionin “Të Paekspozuarit”, Hoxha ka deklaruar se kanë qenë 4 persona, nga të cilët 3 prej tyre kanë qëlluar me breshëri dhe makina ka marrë zjarr.
Sipas Hoxhës, dyshimet janë se sulme të tilla bëhen për shkak të kultivimit të kanabisit në zonë dhe raporteve që duhet të bëjnë punonjësit e policisë. Gazetari thekson se këto ngjarje janë shtuar shumë në Shkodër. ‘Vetëm në janar janë hedhur në erë dy makina të inspektorëve’.
Askush nuk është vënë në pranga, e për këtë nuk na kanë ndihmuar, fatkeqsisht as satelitët revolucionar, të cilësuar nga qeveria si një arritje e madhe për vendin, Albania 1 dhe Albania 2. Askush nuk ka parë asgjë nga këta satelitë, asnjë pamje, asnjë ndihmë për policinë që të kapen autorët e ngjarjeve kriminale, vetëm miliona euro të harxhuara dhe propagandë në media. Ato para mund t’i shërbenin realisht vendit, për një vepër të mirë në rritjen e sigurisë, pasi Shqipëria është kthyer si vendet e Amerikës Latine, ku bandat e armatosura përplasen me njëra tjetrën, duke lënë shumë viktima dhe një shoqëri drejt regresit.
“Ditën që ka ndodhur ngjarja, të martën në darkë, Gjergj Ndërshtiqaj ka qenë në shkollë, në Tiranë. Në makinë ka qenë edhe kunati Gjon Nika. Ata nuk e kanë vënë re se kanë patur dikë mbrapa. Afër vendit ku do të ndalonin, e kanë nuhatur. Polici dhe kunati janë qëlluar me 4 karikatorë fishekësh.
Polici ka qenë inspektor në zonën e Shoshit, zonën ku u qëllua helikopteri. Policia e Shkodrës kanë patur shumë ngjarje. Vetëm në janar janë hedhur në erë dy makina të inspektorëve. Këta bëjnë raporte se çfarë ndodh. Në 2022 kanë qenë 6 raste dhe policia goditet më shumë se kudo. Dyshimi, deri në këto momente, kur të dy janë plagosur dhe janë nën mjekim. Nuk kisha parë aq shumë tabela të verdha që fiksojnë predhat, as në Meksikë.
Ishte një ngjarje barbare. Kanë qëlluar tre persona, nga 4 dhe makina ka marrë zjarr. Oficeri ka dyshuar dhe janë pozicionuar pas një barriere betoni. Autorët duket se nuk janë vrasës profesionistë dhe kanë patur duf dhe inat. Nga 1997 nuk mbaj mend ngjarje të tilla, ishte vendi i zverdhur nga tabelat. Gjergji, verën e vitit të kaluar, shpëtoi dy turistë dhe u bë hero dhe në këtë rast e ka shpëtuar Zoti.
Sulmet gjatë viteve të fundit kanë ardhur për shkak të kultivimit të kanabisit”-tha Hoxha.
