Ambasadorja e Shteteve të Bashkuara të Amerikës, Yuri Kim me anë të një postimi në rrjetet sociale thotë se SHBA pret që SPAK të hetoj penalisht korrupsionin dhe krimin e organizuar.
Ambasadorja ka bërë me dije se ka zhvilluar një takim me kreun e SPAK, Arben Kraja dhe është shprehur se pritet që të ketë ndjekje penale për çdo person që ka shkelur ligjin, pavarësisht sa i pasur apo i varfë apo i fuqishëm është. Ndër të tjera Kim ka shkruar se SPAK, po sjell rezultate çdo ditë.
“Takova kreun e SPAK, Arben Kraja për të theksuar pritshmërinë e SHBA që SPAK-u shqiptar do të ndjekë penalisht korrupsionin dhe krimin e organizuar – pavarësisht sa të fuqishëm apo të pasur, pavarësisht me cilën parti. Me më shumë prokurorë dhe hetues të rinj në BKH, SPAK po sjell më shumë rezultate çdo ditë”, shkruan ambasadorja amerikane.
Më tej ambasadorja ka bërë edhe bilancin me shifra, se çfarë ka ndodhur gjatë kësaj periudhe kohore.
“Prej fillimit të 2021, SPAK ka hapur 264 çështje të reja (218 për korrupsion dhe 46 për krim të organizuar). 127 persona janë dënuar. Vendimet përfundimtare të gjykatave kanë konfirmuar konfiskimin e më shumë se 70 milion eurove, të cilat i kanë kaluar shtetit shqiptar. Hap pas hapi…“, mbyllet postimi i ambasadores amerikane.
