Ambasadori i Bashkimit Evropian në Tiranë, Luigi Soreca i bën thirrje urgjente votuesve të rinovojnë dokumentat biometrike, ndërsa Shqipëria ndodhet në vit zgjedhor.
Për Luigi Soreca kjo çështje përbën një sfidë të madhe për mbarëvajtjen e zgjedhjeve të 25 prillit.
Pas një takimi online me kreun e KQZ-së, Ilirjan Celibashi, përfaqësuesi diplomatik i Brukselit vlerësoi bashkëpunimin me këtë institucion dhe shtoi se po punohet për zbatimin e kodit të ri zgjedhor bazuar në reformën e 5 qershorit.
“Diskutim i mirë online me Kryetarin e KQZ Ilirjan Celibashi, falë OSCE Presence in Albania. Puna ështe duke vazhduar mirë në zbatimin e kodit të ri zgjedhor bazuar në reformën e 5 qershorit. Por ende rinovimi i shumë dokumenteve identifikuese biometrike është sfidë e madhe. U bëjmë thirrje qytetarëve shqiptarë që t’i rinovojnë urgjentisht përpara ditës së zgjedhjeve,” shkroi Luigi Soreca në Facebook.
Nga 3.5 milionë shqiptarë me të drejtë vote, më shumë se një e treta e tyre mund të mos kenë mundësi të votojnë në zgjedhjet e 25 prillit për shkak të skadimit të kartës së identitetit.
Një numër i konsiderueshëm qytetarësh për shkak të shtyrjes së afatit të vlefshmërisë, nuk shkuan pranë zyrave të aplikimit për t’u pajisur me dokumentet e reja biometrike. Rreth 1 milionë shtetas. 800 e ca mijë deri më 31 dhjetor dhe 100 mijë deri në 25 prill, iu kanë skaduar. /Gazetareforma.com/
