Ambasada e SHBA-së në Shqipëri së fundmi ka publikuar një video ku paraqiten pamjet nga salla e re e gjyqit në vendin tonë, e financuar nga USAID, duke u shprehur se reformat e suksesshme në drejtësi mbështeten te gjyqtarët e rinj.
Ambasada amerikane shkruan në Facebook se USAID-i bashkëpunoi me Shkollën e Magjistraturës për të ngritur këtë sallë moderne të gjyqit imitues, ku mund të realizohen trajnime praktike dhe të bazuara në përvojën e drejtpërdrejtë të kandidatëve për gjyqtarë.
“Reformat e suksesshme në drejtësi mbështeten te gjyqtarët e rinj që kanë marrë trajnimin e duhur dhe janë të pajisur me mjetet e duhura për të bërë punën e tyre. Kjo është arsyeja pse USAID-i bashkëpunoi me Shkollën e Magjistraturës për të ngritur një sallë moderne të gjyqit imitues, ku mund të realizohen trajnime praktike dhe të bazuara në përvojën e drejtpërdrejtë të kandidatëve për gjyqtarë. Një sallë gjykimi e jashtëzakonshme dhe një menaxhim i mirë i procesit gjyqësor përbëjnë kompentencat thelbësore të një gjyqtari që e bën si duhet punën e tij”, shkruan ambasada e SHBA-së.
https://www.facebook.com/74591195837/posts/10157414043705838/
Kujtojmë se në javën që po lëmë pas dy Reformat, ajo në Drejtësi dhe ajo Zgjedhore kanë qenë në qendër të vëmendjes.
Ambasadorja e SHBA, Yuri Kim, trazoi ujërat me deklaratën të saj, në të cilën shprehej se shpresonte që fjalët për një marrëveshje kundër Reformës në Drejtësi, të mos ishin të vërteta.
Të gjitha palët e kanë mohuar të jenë të përfshirë në një marrëveshje, teksa kanë hedhur akuza për kundërshtarët.
Presidenti i vendit, Ilir Meta ka shpalosur platformën me 14 pika për Reformën në Drejtësi, të cilën ia ka dorëzuar palëve, teksa sqaroi se ambasada amerikane nuk ka asnjë shigjetim ndaj tij, pasi e ka takuar dhe informuar ambasadoren Yuri Kim, hap pas hapi për veprimet e tij, po ashtu edhe platformën.
