Protesta e ditës së nesërme të opozitës ka zgjuar edhe reagimet e para dhe këtë herë ka qenë Ambasada e Shteteve të Bashkuara që është duke bërë thirrje.
Në një deklaratë zyrtare ambasada i ka bërë thirrje qytetarëve që të tubojnë në mënyrë paqësore. Ndër të tjera në reagim thuhet se protesta është një mjet demokratik dhe si i tillë nuk duhet të kompromentohet.
“E drejta për t’u përfshirë në protesta paqësore është një e drejtë themelore demokratike. Përgjatë muajve të fundit, pjesa më e madhe e pjesëmarrësve kanë ushtruar të drejtën e tyre për të protestuar paqësisht. Megjithatë, në çastin kur një protestë paqësore njolloset nga një akt dhune, qoftë edhe nga një individ, qëllimi demokratik i protestës kompromentohet. Është e paligjshme dhe jo demokratike të kryesh akte dhune, përfshirë edhe shkatërrimin e pronës. Iu bëjmë thirrje të gjithë personave të përfshirë në protestën e së shtunës që të refuzojnë dhunën për të siguruar një protestë paqësore dhe konstruktive”, thuhet në deklaratën ambasadës amerikane.
